ទម្រាំតែដឹងថាស្រលាញ់
ជាក្រិត្យក្រមធម្មជាតិ បានតាក់តែងផ្តល់ឲ្យមនុស្សមានសេចក្តីស្នេហាគ្រប់ៗរូប។ តែសេចក្តីស្នេហាមិនដែលអនុលោមទៅតាមចិត្ត បុគ្គលណាម្នាក់ទាំងស្រុងនោះឡើយ។ មើលតែរូបនាងខ្ញុំចុះ នៅក្មេងសោះ ធ្លាប់ស្គាល់ទំហំនៃការឈឺចាប់ដ៏សែនគ្រាំគ្រារួចទៅហើយ សូម្បីតែនាងខ្ញុំមិនដែលគិតថា ចង់ប្រឡូកជាមួយស្នេហាសោះ ព្រោះអ្វីទៅ? កាលពីថ្ងៃបុណ្យណូអែលឆ្នាំមុន មានបុរសម្នាក់បានលះបង់សេចក្តីថ្លៃថ្នូរ មកសារភាពសុំសេចក្តីស្នេហាចំពោះមុខនាងខ្ញុំ ថែមទាំងបានជូនកាដូដ៏មានអត្ថន័យមួយទៀត។ ផ្ទុយទៅវិញតរុណីដ៏វ័យក្មេងដូចជារូបនាងខ្ញុំ បានបដិសេធយ៉ាងដាច់អហង្ការ ដោយលើកហេតុផលគ្រប់យ៉ាងដើម្បីធ្វើឲ្យបុរសម្នាក់នោះឈប់មាន គំនិតដូច្នេះទៀត។ ពិតណាស់ នាងខ្ញុំទើបតែមានអាយុ ១៦ ឆ្នាំប៉ុណ្ណោះ វាគឺជាវ័យដែលឆាប់ភ្លើតភ្លើន ចំពោះបរិយាកាសសង្គមអំណោយផលឲ្យ តែប្រសិនបើយើងចេះប្រយ័ត្នការពារដោយខ្លួនឯង មានន័យថាកុំភ្លេចខ្លួន យើងនឹងអាចចៀសផុតពីឥទ្ធិពលនោះ។ ដោយតែងតែមានទស្សនៈដូច្នេះហើយ ទើបបណ្តាលឲ្យមនុស្សប្រុសជាច្រើនបង់ចិត្តស្នេហានាងខ្ញុំ ត្រូវបរាជ័យគ្រប់ៗគ្នា ព្រោះតែទំនើងចិត្តដ៏រឹងមាំមិនងាយភ្លាត់នឹងល្បិចលួងលោម ស្នេហារបស់គេ។ ចុះហេតុអ្វីក៏គេម្នាក់នោះ មិនអស់សង្ឃឹមដូចជាពួកគេអ៊ីចឹង? គេបានប្រាប់តាមរយៈមិត្តភក្តិរបស់នាងខ្ញុំថា «ចាំមើលខ្ញុំនឹងធ្វើឲ្យនារីម្នាក់នោះ ស្រលាញ់ខ្ញុំឲ្យទាល់តែបាន ទោះជាត្រូវលះបង់អ្វីក៏ដោយ!» ឮសម្តីនេះ នាងខ្ញុំក៏ចាំតែមើលដូចគ្នាដែរ តើវានឹងកើតឡើងយ៉ាងម៉េចទៅ?
គេយកចិត្តទុកដាក់គ្រប់បែបយ៉ាង គ្រប់មធ្យោបាយ តែអ្វីៗទាំងអស់ធ្វើឲ្យនាងខ្ញុំមានអារម្មណ៍ធុញទ្រាន់ណាស់ ជួនកាលនាងខ្ញុំរត់គេចពីគេទៀតផង។ ថ្ងៃមួយគេក៏សុំនិយាយជាមួយនាងខ្ញុំតែពីរនាក់ ដោយសារការអង្វរករពីមិត្តភក្តិ នាងខ្ញុំក៏យល់ព្រម។ គេនិយាយយ៉ាងស្រងូតស្រងាត់ថា៖
«ខ្ញុំធ្លាប់ជួបវិបត្តិស្នេហ៍ម្តងរួចទៅហើយ ហេតុអ្វីក៏អ្នកដាច់ចិត្តបំផ្លាញបេះដូងខ្ញុំ ជាលើកទីពីរទៀត មិនអាណិតខ្ញុំខ្លះទេឬ? ខ្ញុំមានសេចក្តីសុខបំផុតពេលដែលខ្ញុំបានឃើញមុខអ្នក ដែលជានារីដ៏មានន័យលើសអ្វីៗទាំងអស់ក្នុងមួយជីវិតខ្ញុំនេះ។ បើទោះជាអ្នកមិនស្រឡាញ់ខ្ញុំក្តី តែខ្ញុំបានសន្យាខ្លួនឯងថា ខ្ញុំនឹងមានតែអ្នកម្នាក់គត់ ទោះជាទៅថ្ងៃក្រោយអ្នកមានគ្រួសារក៏ដោយ ក៏បេះដូងរបស់ខ្ញុំនៅតែឆ្លាក់ឈ្មោះអ្នកជាប់ក្នុងចិត្តជា ដរាប។»
គ្រាន់តែបានឮសម្តីរបស់គេភ្លាម ចិត្តជានារីបេះដូងដែកម្នាក់ ចេះតែមានអារម្មណ៍គិតរហូត តើគួរដោះស្រាយយ៉ាងណាទៀតទៅ? ពាក្យពេចន៍ទាំងប៉ុន្មានបានបណ្តេញចិត្តដែលធ្លាប់រឹងរូសប្រែទៅជា ការអាណិតរូបគេបន្តិចម្តងៗ ពិសេសទៅទៀតរាល់ទង្វើទាំងអម្បាលម៉ានរបស់គេ កាន់តែធ្វើឲ្យនាងខ្ញុំស្មុគស្មាញឡើងជាលំដាប់។ ជាច្រើនថ្ងៃក្រោយមក នាងខ្ញុំប្រាប់គេថា «តើយើងគួរតែចងមិត្តនឹងគ្នា មិនល្អទេឬ? សម្រាប់បច្ចុប្បន្ននេះខ្ញុំមិនទាន់គិតទេ ប៉ុន្តែនៅពេលអនាគត ខ្ញុំពិតជាគិតពីវា ចាត់ទុកថាយើងគឺជាមិត្តសិនទៅបានហើយ គ្រប់យ៉ាងស្ថិតនៅលើពេលវេលាជាអ្នកពិសោធន៍ បើអ្នកស្មោះ នឹងខ្ញុំមែន រឿងអ្វីដែលត្រូវខ្លាច!»។ មិនដូចការដែលនាងខ្ញុំគិតសោះ គេមិនគួរនិយាយថា «ខ្ញុំមិនត្រូវការមិត្តភាពពីនារីដែលខ្ញុំស្រលាញ់នោះទេ ហេតុអ្វីក៏អ្នកមិនអាចផ្តល់សេចក្តីស្នេហាជូនខ្ញុំបាន? ខ្ញុំមិនល្អត្រង់ណា?»។ ស្តាប់ហើយនាងខ្ញុំគ្មានពាក្យនឹងពន្យល់ទៀតទេ ព្រោះអស់សមត្ថភាពនឹងធ្វើយ៉ាងណាឲ្យគេយល់ជាងនេះទៀត។ ជារៀងរាល់ថ្ងៃ នាងខ្ញុំកាន់តែមានអារម្មណ៍នឹកគិតដល់បុរសម្នាក់នោះ កាន់តែ ខ្លាំងឡើងៗ។ គេមិនដូចជាបុរសមុនៗ ដែលតាមសុំស្នេហ៍នាងខ្ញុំឡើយ។ ហេតុអ្វីក៏គេធ្វើឲ្យនាងខ្ញុំអាណិតគេខ្លាំងម្ល៉េះ? ចិត្តដែលធ្លាប់តែស្អប់គេ ឥឡូវនេះទៅណាអស់ហើយ? នាងខ្ញុំមិនចង់គិតពីរឿងនោះទេ តែមានអ្វីជាច្រើនបានជម្រុញឲ្យនាងខ្ញុំមិនអាចហាមឃាត់ចិត្ត របស់ខ្លួនឯងបាន។
មិនយូរប៉ុន្មាននាងខ្ញុំក៏បានជួបគេ។ ហេតុអ្វីក៏ខ្ញុំត្រេកអរខ្លាំងម្ល៉េះ? គេបានដើរសំដៅមករកនាងខ្ញុំ ហើយនិយាយថា «សូមទោសចំពោះការរំខានទាំងប៉ុន្មាន ពេលនេះខ្ញុំបានដឹងខ្លួនឯងច្បាស់ណាស់ថា អ្នកមិនដែលស្រលាញ់ខ្ញុំសូម្បីតែបន្តិច ដូច្នេះដើម្បីកុំឲ្យអ្នកធុញទ្រាន់តទៅទៀត ខ្ញុំសូមដកខ្លួនចេញពីជីវិតរបស់អ្នកត្រឹមនេះទៅចុះ ចាត់ទុកថា ខ្ញុំមាននិស្ស័យបានជួបតែគ្មានវាសនានឹងឈោងចាប់អ្នកបានទេ ហើយក៏សូមជូនពរអ្នក និងមនុស្សម្នាក់ទៀតដែលមានសំណាងល្អជាងខ្ញុំ!»។
នាងខ្ញុំស្ទើរតែមិនជឿសោះថា គេពោលពាក្យបែបនេះ។ ទោះបីជាយ៉ាងណា នាងខ្ញុំខំញញឹមទាំងចិត្តក្តុកក្តួលនិយាយថា «ល្អណាស់! ដែលអ្នកយល់ថាស័ក្តិសមនឹងធ្វើបែបនេះ!» បន្ទាប់មកយើងទាំងពីរក៏បានលាគ្នាជាចុងក្រោយ។ ក្រសែភ្នែកដ៏ស្រទន់របស់គេបានបញ្ជាក់ថា គ្មានអ្វីនឹងត្រលប់មកវិញម្តងទៀតទេ។ ចុះចំណែកខ្ញុំវិញ? ខ្ញុំក៏ចង់បង្ហាញថា នាងខ្ញុំក៏ស្រលាញ់គេដែរ តែគ្រប់យ៉ាងវាហួសពេលទៅហើយ។ វិប្បដិសារៈបានគ្របដណ្តប់ពេញបេះដូងនាងខ្ញុំ គ្រប់ពេលដែលគិតដល់គេ។ ត្រលប់មករកខ្ញុំវិញមក ខ្ញុំចង់ឲ្យអ្វីៗដូចដើម… តែនេះគ្រាន់តែជាការគិតស្រមើស្រមៃរបស់មនុស្សមានវិបត្តិផ្លូវ ចិត្តម្នាក់ប៉ុណ្ណោះ។ ខ្ញុំយំព្រោះខ្ញុំនឹកគេ ខ្ញុំមានអារម្មណ៍ខ្មាសខ្លួនឯងណាស់ ព្រោះពីមុនខ្ញុំមិនមែនអ៊ីចឹងទេ។ នាងខ្ញុំនៅតែមិនអាចបំភ្លេចគេបាន តើនេះជាកម្មស្នងវិញឬ? មែន! គេឈ្នះនាងខ្ញុំហើយ ឈ្នះដោយមិនដឹងខ្លួន ឈ្នះដោយភាពក្លែងក្លាយ។ តើក្នុងថ្ងៃបុណ្យណូអែលឆ្នាំនេះ គេអាចចងចាំឈ្មោះមនុស្សស្រីម្នាក់នេះបានឬទេ?